भ्रमण वर्षमा भिडियो च्यालेञ्ज प्रतियोगिता हुँदै, पाँच मिनेटको भिडियो पठाउन सकिने

  • प्रकाशित मिति : बुधबार, मंसिर १८, २०७६
  • Tourism Sanchar

काठमाडौँ, मङ्सिर १८। नेपाल भ्रमण वर्ष २०२० एक महिनापछि शुरु हुँदैछ। अङ्ग्रेजी वर्ष सन् २०२० लाई नेपाल भ्रमण वर्षको रुपमा मनाएर उक्त अवधिमा २० लाख पर्यटक भित्र्याउने सरकारी लक्ष्य छ।

उक्त लक्ष्यलाई सार्थक तुल्याउन सरकार, निजी क्षेत्र सबैको सरोकार भएकाले राष्ट्रिय र अन्तर्राष्ट्रिय रुपमा भ्रमण वर्षको प्रभावकारी प्रवद्र्धन भईरहेको छ।

भ्रमण वर्षमा बढीभन्दा बढी पर्यटकलाई आकर्षण गर्न ‘वि विल राईज’ फाउण्डेशनले ‘भिडियो च्यालेञ्ज २०२०’ प्रतियोगिता आयोजना गर्ने भएको छ। देशका ओझेलमा रहेका पर्यटकीयस्थललाई उजागर गर्ने प्रयास स्वरुप फाउण्डेशनले ‘मेरो गाउँ, मेरो ठाउँ’ भन्ने अभियानअन्तर्गत भिडियो च्यालेञ्ज प्रतियोगिता आयोजना गर्न लागेको हो।

नेपाल भ्रमण वर्ष सचिवालयमा शनिबार आयोजित कार्यक्रममा दोस्रो चरणको भिडियो च्यालेञ्ज प्रतियोगिता सञ्चालन गर्न लागेको जानकारी दिइयो। फाउन्डेशनका कार्यक्रम संयोजक प्रभात रिमालका अनुसार प्रतियोगितामा सहभागिता जनाउन डिसेम्बर १ देखि भिडियो पठाउन सकिनेछ। सहभागीले महत्वपूर्ण प्राकृतिक, सांस्कृतिक सम्पदा, स्थानीय वेषभूषा, जातजातिको पहिचान, खानपान, कला संस्कृतिलगायतका विषयवस्तुलाई समेटेर पाँच मिनेटको भिडियो बनाउनुपर्नेछ ।

यसमा विभिन्न १० विधामा दिइने अवार्डका लागि ७० वटा भिडियो मनोनयन गरिनेछ । मनोनयमा परेकामध्ये उत्कृष्ट १० भिडियोलाई आगामी अप्रिल महिनामा आयोजना हुने कार्यक्रममा पुरस्कृत गरिने जनाएको छ । प्रतियोगितामा पहिलो हुनेलाई रु पाँच लाख, दोस्रोलाई तीन लाख, तेस्रोलाई दुई लाख र बाँकी सात विधामा एक–एक लाख रुपैयाँ पुरस्कार प्रदान गरिनेछ ।

कार्यक्रममा भ्रमण वष अभियानका राष्ट्रिय कार्यक्रम संयोजक सुरज वैद्यले भ्रमण वर्षको सन्दर्भमा देशभरका ओझेलमा परेका पर्यटकीय गन्तव्यको प्रचारप्रसार भई पर्यटक आकर्षण गर्न प्रतियोगिताले सहयोग पुग्ने बताउनुभयो। उहाँले भ्रमण वर्षलाई देशको साझा अभियानको रुपमा मनाउन सबै क्षेत्रले आआफ्नो स्थानबाट सक्रिय योगदान गर्न जरुरी भएको उल्लेख गर्नुभयो ।