नेपाल घुम्न आउने पर्यटकहरूको घुइँचो

काठमाडौं,फाल्गुन २७ । सन् २०१९ को दोस्रो महिना अर्थात फेब्रुअरीमा नेपालमा एक लाख २४ हजार चार सय २१ जना पर्यटक नेपाल घुम्न आएका छन् । गएको महिनामा ९७ हजार ६ सय ९४ पर्यटक हवाई मार्गमार्फत र २६ हजार सात सय २७ जना पर्यटक स्थल मार्ग भएर नेपाल आएको नेपाल पर्यटन बोर्डले जनाएको छ । यो संख्या गएको वर्षको फेब्रुअरी महिनामा नेपाल आएको पर्यटकको संख्याभन्दा ३९ प्रतिशतले धेरै हाे ।

यस्तै पछिल्लो महिनामा १६ हजार २ सय ५ चिनियाँ पर्यटक नेपाल आएका छन् । गएको बर्षको तुलनामा थाइल्याण्डबाट नेपाल आउने पर्यटकको संख्या एक सय नौ प्रतिशतले बढेको छ, यस्तै जापानबाट २० प्रतिशत र कोरियाबाट ४७ प्रतिशत धेरै पर्यटक फेब्रुअरीमा नेपाल आएका छन् । 

सन् २०१८ को फेबु्रअरीको तुलनामा यो फेब्रुअरीमा भारतबाट नेपाल आउने पर्यटक झण्डै दोब्बरले बढेका छन् । सार्क देशबाट पछिल्लो महिनामा ३१ हजार ८ सय ३१ पर्यटक नेपाल आएका छन्, जुन पोहोरको फेब्रुअरीको तुलनामा ८५ प्रतिशतले धेरै हो ।

यस्तै युरोपेली देशबाट नेपाल आउने पर्यटक पनि बढेका छन् । गएको महिना बेलायतबाट  पाँच हजार दुई सय ६८, जर्मनीबाट तीन हजार तीन सय ४० र फ्रान्सबाट एक हजार नौ सय ७८ पर्यटक नेपाल आएका छन् ।