• मङ्लबार, माघ ८, २०७५

काठमाडौं,माघ ८। पशुपतिनाथको जग्गामा चरम लापरबाही भएको पाइएको छ । पशुपति क्षेत्र विकास कोषमा राजधानी र आसपासमा मात्र ४ हजार ६ सय ७३ रोपनी जग्गा भएपनि यसको सदुपयोग हुन सकेको छैन ।

करोडौं भाडा उठ्न सक्ने जग्गामा पनि हाल वार्षिक ५६ लाख ३१ हजार रुपैयाँमै कोषले चित्त बुझाउनुपरेको छ । कोषले कुत आम्दानी राम्रो गर्न नसकेपनि व्यवसायीले भने अकुत कमाइरहेका छन् ।

पशुपतिको काठमाडौंस्थित भीमसेनगोला, शंखमूल र मूलपानीका तीनवटा मौजामा रहेको ३ सय रोपनी जग्गा गायब भएको छ । तराईका चार जिल्लाको ११ सय रोपनी जग्गा पनि गायब अवस्थामा नै रहेको छ । पशुपति गुठीको नाममा दर्ता भएका जग्गामध्ये साविकको लगतबाट करिब ३५० रोपनी अझै पत्ता लगाउन सकेको छैन । कोषअन्तर्गतका सबै गुठी जग्गाको लगत पनि कोषसँग नभएको समाचार आजको अन्नपूर्ण पोस्ट् दैनिकले प्रकाशित गरेको छ ।