मनकामना मन्दिरको जिर्णोद्धार कार्य सम्पन्न, सर्वसाधारणले दर्शन दशैसम्म गर्न पाउने

  • प्रकाशित मिति : बिहिबार, भदौ २८, २०७५
  • Tourism Sanchar

जि.पि.पौडेल / गोरखा,भदौ २८ ।  करिब ४ सय वर्ष पहिले बनेको गोरखाको प्रसिद्ध धार्मिक स्थल मनकामना मन्दिरको जिर्णोद्धार कार्य सम्पन्न भएको छ । बि.स.२०७२ साल देखि जिर्णोद्धार कार्य सुरु गरिएको पुरातत्व बिभागको डिजाइन अनुरुप नै मन्दिर निर्माण कार्य सकिएको जिर्णोद्धार समितिका संयोजक नरेन्द्र बाबु श्रेष्ठले जानकारी दिएका छन ।

झण्डै १३ करोड रुपैयाँ खर्च गरी पुरानै ढाँचामा निर्माण गरिएको मनकामना मन्दिरमा करिब ८ करोड बराबरको सुनको जलप लगाएको संयोजक श्रेष्ठले बताएका छन । उनका अनुसार सुनको जलप लगाउँदा १८ किलो २०० ग्राम सुन प्रयोग गरिएको छ । मन्दिरको जिर्णोद्धार गर्दा लागेको एकमुष्ठ लागत अडिट सकेपछि मात्र सार्वजनिक गरीने समितीले जनाएको छ ।

मन्दिरको जिर्णोद्धार सम्पन्न भए पनि आँगनमा ढुङ्गा छाप्ने काम बाँकी रहेको र दशैँ वा कात्तिक सम्म भक्तजनहरुका लागि मन्दिर खुला गरिने लक्ष्य रहको समितीले जानकारी दिएको छ ।

गत वर्ष नै जिर्णोद्धार सम्पन्न गर्ने लक्ष्य राखिएको उक्त मन्दिर भूकम्प, नाकाबन्दी, काठ अभाव लगायतका कारणले तोकिएको समय भन्दा झण्डै एक वर्ष ढिलो सम्पन्न भएको हो ।